लंडन : तंत्रज्ञानाच्या प्रगतीमुळे लंडनमध्ये चक्क एका ५३ वर्षांच्या व्यक्तीचा जबडा थ्री-डी प्रिंटरच्या साह्याने तयार करण्यात यश आले आहे. तेथील भारतीय वंशाच्या शल्यविशारदाने ही कामगिरी केली आहे. संबंधित रुग्णाच्या एका पायाच्या हाडाचा वापर जबडा तयार करण्यासाठी करण्यात आला आहे.
डॉ. दया गहीर असे या शल्यविशारदाचे नाव असून, इंग्लंडमधील पश्चिम मिडलँड रॉयल विद्यापीठ रुग्णालयात ते कार्यरत आहेत. रुग्णाचा चेहरा, डोके आणि मानेच्या शस्त्रक्रिया करण्यात डॉ. दया यांचा विशेष हातखंडा आहे. दर वर्षी ते सुमारे ४० अवयवांची पुनर्रचना करतात. या थ्री-डी प्रिंटरमुळे डॉ. दया यांचे काम अधिक सुलभ झाले आहे.
‘शस्त्रक्रियांसाठी लागणारे साहित्यही या थ्री-डी प्रिंटरच्या माध्यामातून तयार केले जाते. तसेच शस्त्रक्रियेमध्येही त्याचा उपयोग केला जातो,’ अशी माहिती डॉ. दया गहीर यांनी स्थानिक वृत्तपत्राशी बोलताना दिली. ब्रिटनमधील रॉयल हॉस्पिटलकडेच अशा प्रकारचा थ्री-डी प्रिंटर आहे. तंत्रज्ञानाची ही प्रगती आ वासून पाहण्यासारखीच आहे.